Templates by BIGtheme NET

Presidenti Meta nuk dekreton ligjin për rininë

Presidenti Ilir Meta nuk ka dekretuar ligjin për rininë. një ditë pas “Ditës së Rinisë” ai e ka rikthyer përsëri këtë projektligj në Kuvend. Sipas kreut të shtetit, ky ligj është në kundërshtim të hapur me kushtetutën.

Lajmi është bërë publik nga Qendra për Mbrojtjen e të Drejtave të Fëmijëve në Shqipëri (CRCA). Përmes një njoftimi, CRCA thotë se ligji në fjalë është në kundërshtim me standartet bazë të të drejtave të njeriut, të mbrojtura dhe të garantuara nga Kushtetuta e Shqipërisë, si dhe aktet kryesore të OKB-së dhe të Këshillit të Europës. Po ashtu thotë se shpreson që Qeveria dhe Kuvendi të reflektojnë për t’u ulur me organizatat rinore që kanë qenë kritike.

NJOFTIMI I CRCA

Zyra e Presidenti të Republikës njoftoi se nuk e ka dekretuar Ligjin e Rinisë! Refuzimi vjen në një ditë simbolike, që përkon me Ditën e Rinisë, duke i dhënë një mesazh të fortë Qeverisë dhe Kuvendit, duke deklaruar se në gjendjen aktuale Ligji i Rinisë është në kundërshtim të hapur me Kushtetutën.

Presidenti i Shqipërisë, ju përgjigj kështu ligjërisht edhe kërkesës që CRCA/ECPAT Shqipëri dhe Rrjeti Kombëtar për të Rinjtë në Shqipëri, i kish drejtuar rreth një muaj më parë, për të mos e dekretuar Ligjin e Rinisë. Ky ligj që në pikënisjen e tij, shfaqi probleme të thella ligjore dhe ndër të tjera nuk përputhej me kërkesat dhe pritshmëritë e të rinjve.

Ligji i Rinisë, në versionin e miratuar nga Kuvendi, vendos nën diktatin e Qeverisë, Ministrit të Arsimit dhe të Kryetarëve të Bashkive organizatat dhe lëvizjen Rinore. Ai është në kundërshtim të plotë me standartet bazë të të drejtave të njeriut, të mbrojtura dhe të garantuara nga Kushtetuta e Shqipërisë, si dhe aktet kryesore të OKB-së dhe të Këshillit të Europës. Ligji ka mungesë serioze të “check and balances” ndërmjet autoriteteve publike, të drejtave dhe përgjegjësive që ato gëzojnë, si dhe të rinjve, që janë përfitues dhe llogari-kërkues përkundrejt institucioneve që punojnë për ta.

CRCA/ECPAT Shqipëri dhe Rrjeti Kombëtare për të Rinjtë në Shqipëri (ANYN), janë të vetmet organizata që kanë ndjekur hap pas hapi të gjithë procesin e diskutimit dhe miratimit të projektligjit. Edhe pse ne për muaj të tërë kërkuam rishikimin dhe përmirësimin serioz të tij, Parlamenti i Shqipërisë e miratoi atë më 4 Nëntor 2019 me 79 vota, në mungesë të plotë opozitës.

CRCA/ECPAT Shqipëri, vijon të mbetet shpresëplotë se mos-dekretimi i këtij Ligji nga ana e Presidentit do të shërbejë si një situatë reflektimi nga ana e Qeverisë dhe Kuvendit për t’u ulur me organizatat Rinore që kanë qenë kritike të tij, për të gjetur një zgjidhje konsensuale, që mbi të gjitha respekton të drejat e të rinjve në Shqipëri!

Komento

Adresa e email nuk do te publikohet. Fushat jane te domosdoshme *

*