Templates by BIGtheme NET

Eni Vasili letër Ramës pasi u kap me më shumë se 2 të ftuar: S’jemi fasonë

Moderatorja e emisionit “Open”, Eni Vasili ka reaguar me një letër publike pas paralajmërimit të AMA-s për procedim administrativ lidhur me shkeljen e rregullave të distancimit social, që i ka kushtëzuar programet që të kenë vetëm dy persona të ftuar në studio.

Pasi i shkeli këto rregulla, Vasili i ka kërkuar kryeministrit Edi Rama përmes një letre publike, t’i çlirojë studiot televizive nga ky rregull.

Vasili kujton se në studio ka patur të ftuar edhe mjekun Roland Xhaxho, para se ai të zbulonte se ishte i prekur nga COVID-19. E megjithatë stafi nuk u ka infektuar.

“I nderuar zoti Kryeministër! Të hënën e ardhshme bëhen plot 9 javë nga 9 marsi, dita kur në Shqipëri u zbuluan dy rastet e para me Covid-19. Këto 9 javë të gjata sa 9 muaj, gjeneruan realitete të reja për shumëkënd nga ne, realitete prej të cilave ndoshta nuk do shpëtojmë për një kohë të gjatë. Nuk do ndahemi dot shpejt as nga frika se një xhest i shpenguar mund të na sëmurë apo se një përqafim mund te jetë një mallkim.

Në këto 50 ditë e më shumë, mësuam të sakrifikojmë ndryshe, të mos i trembemi frikës tonë e t’i mbijetojmë pasigurisë.

Falenderimet dhe përulja e plotë, nuk do mjaftojë asnjëherë për mjekët, infermierët, sanitarët dhe forcat e rendit, por këto javë të jashtëzakonshme eksperience njerëzore të betejës për jetën, nuk do ishin fituar pa mediat dhe studiot televizive, të cilat i bënë bashkë të gjithë në ditët më të errëta, ku vdekja  dhe terrori prej saj, bënin hije mbi kokat tona.

Së bashku mësuam nga e para si të lajmë duart, si të teshtijmë, por mbi të gjitha si t’i japim forcë njëri tjetrit. Këtë e bënë qindra shqiptarë të jashtëzakonshëm, mjekë por jo vetëm,  anembanë botës të cilët vrapuan në dritaret mbi “banaqe”,  të ndanin informacion, eksperiencë dhe solidaritet. E bënë doktorët  e infektivit që na shpjeguan me durim gjithçka dinin e mësonin dhe ata vetë ditë pas dite, e bënë ata gazetarë që nuk u tërhoqën në skuta të ngrohta shtëpish, por qëndruan në detyrë plot dinjitet dhe shqetësim për veten dhe të tjerët.

E ndërsa ekonomia po rihapet e lëvizja po liberalizohet, mbajtja në izolim e studiove televizive, nuk i shërben më askujt. Një gazetar në studio është njësoj i rrezikuar me një apo me tre persona prezentë aty. Mua personalisht do të kishte mjaftuar për të më infektuar mjeku Roland Xhaxho i cili sigurisht nuk e dinte që ishte i virusuar kur erdhi në Open. Fakti tregoi që doktor Xhaxho nuk na infektoi, as mua dhe as stafin e Open i cili pati kontakte me të ato ditë.”– shkruan Vasili.

Modetarorja i kujton Ramës se studiot janë mjaftueshëm të mëdha për të ruajtur distancën sociale dhe për të patur më shumë se 2 të ftuar. Ajo thotë se s’janë biznes fasonë me 600 njerëz, që të trajtohen si të tillë. Ndërsa shton se teknologjia për shkak të vështirësive të komunikimit online, i ka lodhur teleshikuesit. 

 “Studiot janë hapësira të mëdha të cilat ia kalojnë çdo supermarketi ku gëlojnë njerëzit, janë po aq të mëdha në metra katrorë sa një fasoneri, me ndryshimin e vetëm se brenda nuk ka më shumë se 5 -6 njerëz dhe jo 600. Madje studio e Open është thuajse po aq e madhe sa salla e Parlamentit!

Nuk është një kërkesë luksi dhe as një shkujdesje, sepse jam e përgjegjshme për rreziqet për veten dhe të tjerët. Por shërbimi që mund t’i bëjmë opinionit dhe debatit publik duke rifilluar jetën normale në studio, është më i madh se preokupimi për veten. Teknologjia na ndihmoi në kohën e emergjencës, por vështirësitë e lidhjeve me internet, e kanë lodhur me të drejtë teleshikuesin.

Dritaret e vogla te skype ose zoom, jo gjithmonë arrijnë teknikisht të përcjellin mesazhin tek teleshikuesit dhe koha e përqendrimit shkurtohet gjithmonë e më shumë. Publikut duhet t’i kthehet e drejta e debatit publik dhe studiove televizive duhet tu kthehet liria! #jetodhefolilir”- përfundon letra e moderatores.

Komento

Adresa e email nuk do te publikohet. Fushat jane te domosdoshme *

*