Templates by BIGtheme NET

Meta: Parimet demokratike e liritë themelore po kërcënohen nga qeverisje që shfaqin tendenca autoritare

Presidenti Meta ka thënë sot se liritë dhe të drejtat e njeriut nuk mund të merren si të mirëqena e të paprekshme.

Në një postim në Facebook me rastin e 45-vjetorit të Aktit Final të Helsinkit, kreu i shtetit thekson se parimet demokratike e liritë themelore në shumë vende të hapësirës së OSBE-së kërcënohen nga qeverisje që shfaqin tendenca autoritare.

“Dita e sotme shënon 45-vjetorin e nënshkrimit të Aktit Final të Helsinkit. Duke sanksionuar parimin e respektimit të lirive themelore dhe të drejtave të njeriut në themel të marrëdhënieve ndërshtetërore, Dekalogu i Helsinkit ndihmoi në fundin e Luftës së Ftohtë dhe çlirimin e Europës Lindore nga totalitarizmi komunist.

Parimet e Aktit Final janë po aq të rëndësishme edhe sot, veçanërisht në kushtet kur parimet demokratike dhe liritë themelore në shumë vende të hapësirës së OSBE-së, kërcënohen nga qeverisje që shfaqin tendenca autoritare që nuk i shërbejnë interesave të qytetarëve.

Ky jubile i rëndësishëm, duhet të na bëjë më të ndërgjegjshëm se, liritë dhe të drejtat e njeriut nuk mund të merren si të mirëqëna e të paprekshme. Për mbrojtjen të tyre duhen përpjekje e vigjilencë e përhershme.

Nëse asokohe Shqipëria komuniste ishte i vetmi vend europian që e denoncoi procesin e Helsinkit, ky përvjetor e gjen vendin tonë në krye të punëve të OSBE-së.

Me marrjen e Kryesisë së Radhës së OSBE-së, Shqipëria ka detyrimin dhe përgjegjësinë që të udhëheqë me shembullin e saj në respektimin e parimeve të Helsinkit, veçanërisht në fushën e forcimit të demokracisë, sundimit të ligjit dhe zgjedhjeve të lira dhe konkurruese në vend.” – shruan Meta në Facebook.

Komento

Adresa e email nuk do te publikohet. Fushat jane te domosdoshme *

*