Zv.komandanti i Forcave Detare, Artur Meçollari është shkarkuar nga detyra. Shkak për këtë është bërë përgatitja në një nga anijet e Rojes Bregdetare të ceremonisë së celebrimit të fëmijës së një ushtaraku.
Vendimi i Ministrisë së Mbrojtjes erdhi pas publikimit të një videoje në rrjetet sociale ku anija shfqet e dekoruar për ceremoninë e celebrimit.
Lidhur me ngjarjen në fjalë, Meçollari ka deklaruar për Report TV se ceremonia në fjalë po mbahej me miratimin e një titullari në Ministrinë e Mbrojtjes e jo të tijën. Ai pohoi se do vijojë të jetë pjesë e Marinës.
Artur Meçollari njihet si një nga anëtarët e ekipit negociator të marrëveshjes detare me Greqinë.
Ai u denoncua nga opozita asokohe si i përfshirë me agjenturat e huaja, por pas kësaj Ministria e Mbrojtjes e ajo e Jashtme publikuan certifikatën e sigurisë së Meçollarit.
Ai ishte pjesë e ekipit negociator të marrëveshjes detare me Greqinë që drejtohej nga ish-ministri i Jashtëm, Ditmir Bushati.