Redon Meksi, djali i ish-kryeministrit Aleksandër Meksi, tregon një episod kur është përballur me policinë dhe është gjobitur për mosmbajtjen e maskës.
Redoni i cili është djali i vogël i ish-kryeministrit të parë të pluralizmit, thotë se 3 ditë më parë u gjobit për maskën sapo doli nga shtëpia.
E kështu me fletën e gjobës në xhep, ai kishte vendosur të dilte nga Kryeministria për të parë çpo bëhej në protestën kundër aktit normativ të qeverisë.
Meksi thotë se është ndaluar nga policët pa të drejtë, të cilët në mënyrë paradoksale e kanë futur në një qeli me 15 persona të tjerë dhe pse në kohë pandemie.
Edhe pse ishin ndaluar për moszbatim të rregullave për mbrojtjen kundër koronavirusit, grupi i protestuesve u ngjeshën krah njëri-tjetrit duke mos zbatuar asnjë lloj distance.
Çfarë shkruan Redon Meksi
Ishte ora 18.10 kur arrita. Pashë që ishin pak njerëz, por gjithsesi vendosa të afrohem kur pashë dhe një të njohurin tim aty. Nuk kaluan 2 minuta, erdhën “sanderlleshat e vegjël”, gjysma civila, kurse ata me uniformë një pjesë të mirë ishin pa numra. Dhe nisin, kap të parin prej leckash – plas në furgon, kap të dytin dhe plase dhunshëm në furgon, e kështu me radhë. Me erdhën mua e me bërtitën që të largohem, dhe unë fillova avash-avash të eci drejt dy kullave.
Bërtiste njeri “ec më shpejt”, kurse unë vazhdoja në ritmin tim, pasi nuk po bëja asgjë të kundraligjshme. Kur arrita në mes të dy kullave me del përpara polici i radhës që bërtiste “ec shpejt, ec shpejt!”, por këtij ju ktheva.
-Ore zoteri, çfarë ligji po shkel unë që po eci avash në trotuar?
Atij s’ju durua dhe me kap prej krahu, pastaj bëhen katër policë e më fusin në makinën e tyre drejt rajonit nr.2 të policisë. Kur arritëm në rajon, më morën telefonin dhe me çuan në birucë me 15 veta. Vetëm njeri ishte i arrestuar për vepër tjetër. Të tjerët njësoj si unë, ishim shoqeruar për tubim të paligjshëm (në kohë pandemie).
Kuptohet, mëqënëse kishim rrezikshmeri të lartë, nuk mund të na linin nëpër zyra të ndryshme për të na marrë deklarimet, por duhet të na fusnin në birucë (aty në atë dhomë 4 me 4 metra) 15 veta. Nuk kishte pandemi! Mbas nja 4 orësh me morën në pyetje dhe me nxorën.
Nuk do e tregoja si histori për publikun, por kur pashë në mes të ditës dhe trafikut, përpara Ministrisë së Jashtme, në kohë pandemie, pa leje dhe duke detyruar delegacion grek të futet nga dera e pasme, dhe policia e lejonte nga frika e numrave protestues, atëhere u acarova dhe vendosa ta bëjë publike dhunën me ne të rinjtë para kryeministrisë, ku nuk bëmë asnjë shkelje. Ne as qëlluam, as shame njeri, thjesht ishim duke thënë me shpirtin tonë se “nuk është e drejtë kjo”.
Jo njerëz, këtu qytetari i lirë s’ka të drejtë të protestojë pa lejen apo organizimin e mbretit!
PS: Unë në protestë nuk shkova prej maskave, por prej aktit normativ të kundraligjshem. Do vazhdoj të dal në protesta pasi mendoj te e drejta e qytetarit të lirë dhe s’do zbatoj asnjë akt normativ të kundraligjshëm në një vend ku nuk ka Gjykatë të Lartë dhe Gjykatë Kushtetuese.
Sa më shume ti bindemi, aq më shumë do e rëndojë doren “mbreti” me shkeljet e tij!
Dhe në fund fare, ai polici që me futi në makinën e policisë më vodhi dhe çadrën!
