Templates by BIGtheme NET

Rruga “Klodian Rasha” nuk është drejtësi për Klodian Rashën

(Ndoshta emërtimi me emrin e një mjeku që humbi jetën në betejën me Kovid do ishte më kuptimplotë edhe për babain fisnik të të riut)

Një rrugë është emërtuar “Klodian Rasha”, emri i djalit që u vra nga një polic në shërbim. Një vendim hileqar i pushtetit vendor. Çfarë evokohet me këtë emërtim? Çfarë u thuhet të rinjve? Çfarë u thuhet njerëzve që kalojnë dhe e lexojnë? Çfarë kujtese përcillet? Çfarë dashurie, atdhedashurie a empatie mbillet?

Nuk flitet për dhimbjen e familjes, ajo nuk mund të platitet veç nga drejtësia, e deri tani ka vetëm pagesa nën dore, siç është edhe emërtimi i kësaj rruge. Flitet për qytetin. Nëse do te mbahej një fjalim aty për këtë emërtim, çfarë do te thuhej për të riun e ndjerë, për angazhimet a arritjet e tij për qytetin, për vendin, apo në botë?! Cilat ishin motivet që u vendos për këtë emërtim, përveç kërkesës së një babai shpirtvrarë? A mjafton krimi i një polici për ta bërë kujtesë të qytetit? Nëse një i huaj kalon dhe pyet, pse e ka këtë emër kjo rruga, çfarë do t’i thotë shoqëruesi, apo ai që do të pyesë? Nuk di pse vendoret tanë janë kaq pabesueshmërisht për të ardhur keq. Historikisht të tillë. Nga ata që vendosin të kryqëzojnë bulevardin e Zogut më atë të Bajram Currit, tek ata që u vendosin rrugëve emrat e Berluskonit e Sarkozisë, ata që i heqin dhe i venë titullin qytetar nderi Veton Surroit brenda një ore, tek ata që bëjnë qytetar nderi nëpunës (ambasadore) të rëndomtë të shteteve, e plot e plot paradokse e dhimbje koke, ku kurorën e mbajnë emërtimet për njerëz me jetë të dyshimte. Një mishmash i dhimbshëm, si në çdo sferë tjetër të jetës shqiptare.

A doni drejtësi për Klodian Rashen? Mos ndiqni paratë, ndiqni lajmin: Cilët e dhanë lajmin që viktima kishte pistoletë, pastaj kishte probleme mendore, pastaj ishte përdorues narkotikësh, etj lajme të tilla që zakonisht përdoren si amortizatorë kur “shket” diçka. Le të ndiqet filli dhe dalin ata që kanë dashur ta mbulojnë Klodianin dy herë. Doni drejtësi? Kërkoni cilët futen në polici frymën ushtarake, agresivitetin dhe sjelljen brutale ndaj qytetareve të thjeshtë. Doni drejtësi? Në fakt vetëm vazhdimi i protestës si ditën e parë deri në nisjen e ristrukturimit të policisë do ishte drejtësia e vërtetë…Emërtimi i një rrugë nuk është si memorialet që i vendosin familjaret në vendet ku janë bërë aksidente, apo vrasje për t’i kujtuar të dashurit e tyre (në fakt edhe kjo ka të bëjë me vendorët). Është shume më e thellë se kaq dhe ka më shumë përgjegjësi se thjesht bërjen e gjithçkaje për të shuar çdo lloj proteste të mundshme, apo çdo qelizë proteste. Ndoshta është koha për reformë të thellë edhe në emërtimet e rrugëve, shkollave, bulevardeve, busteve e monumenteve.

Rruga “Klodian Rasha” nuk është drejtësi për Klodianin, aq më pak është kujtesë për qytetin e për brezat e tij. Ndoshta, emri i një mjeku, vdekur në betejën me Kovidin do ishte më kuptimplote, madje edhe për babain fisnik të Klodianit.

 

Komento

Adresa e email nuk do te publikohet. Fushat jane te domosdoshme *

*