Vendosni fjalën kyçe....

Gjoba 110 milionë euro, PD-ja padit në SPAK Ramën, Agaçin e Hickën: Do e paguajnë dëmin me pasurinë e tyre


Partia Demokratike ka paditur në SPAK kryeministrin Rama, Sekretarin e Përgjithshëm të Kryeministrisë, Engjëll Agaçin dhe ish-Avokaten e Shtetit, Alma Hicka lidhur me gjobën 110 milionë euro ndaj Shqipërisë ndaj biznesmenit Francesco Beçhetti.

Padinë e dorëzoi sekretari për çështjet ligjore në PD, Ivi Kaso, i cili tha se kjo çështje e rëndë nuk mund të kalojë vetëm më deklarata politike por me përgjegjësitë ligjore.

“Çështja e 110 milionë eurove të humbura në gjyqin me Bechetin për interesin personal të Edi Ramës nuk mund të kalojë vetëm me deklarata politike apo me zemërimin e ligjshëm të qytetarëve. Kush u ka shkaktuar dëm qëllimisht shqiptarëve, do të duhet të përgjigjet përpara drejtësisë. Për këtë arsye, sot dorëzuam në SPAK kallëzimin kundër personave kyç që po detyrojnë shqiptarët të paguajnë 110 milionë euro. Mes tyre janë Edi Rama, kryeministri në hije Engjëll Agaçi, me detyrë Sekretar i Përgjithshëm i Këshillit të Ministrave, ish Avokatja e shtetit, Alma Hiçka, e shkarkuar së fundmi si gjyqtare për pasuri të pajustifikuar, si dhe ish drejtues dhe aksionerë të Top Channel, që sot mbajnë detyra të larta shtetërore në qeverinë e Edi Ramës.” – tha Kaso.

Ai shtoi më tej se humbja e gjyqit të Shqipërië ndaj Becchetti-t ndodhi pasi kështu ishte përcaktuar nga kryeministri Rama i cili u soll si bandë mafioze ndaj një biznesmeni që i prishte punë për të ndihmuar një biznes tjetër, me të cilin ndan fitimet.

“Nga i gjithë shqyrtimi që ne i kemi bërë dosjes së arbitrazhit ndërkombëtar, Shqipëria doli e humbur në gjyqin me Bechettin, sepse kështu e kishte përcaktuar Edi Rama. Kryeministri u soll si një bandë mafioze për të sulmuar një biznesmen që i prishte punë, për të ndihmuar një biznes tjetër, me të cilin ndajnë fitimet. Ky dështim i Edi Ramës është një nga faturat më të rënda për Shqipërinë dhe shqiptarët. Është pjesë e dështimeve 8 vjeçare që kanë varfëruar qytetarët, e kanë bërë biznesin të pasigurt, kanë larguar investimet e huaja, kanë mbyllur vendet e punës, na ka mbajtur larg Europës.” – shtoi Kaso.

Ai vijoi më tej duke thënë se SPAK duhet t’u provojë shqiptarëve se investimi te reforma në drejtësi po shpërblehet dhe se abuzimi me pushtetin  s’mund të kalojë pa u ndëshkuar.

“Ky është një rast i artë për SPAK, që  t’u provojë shqiptarëve se investimi i madh tek reforma në drejtësi po shpërblehet dhe abuzimi me pushtetin nuk do të kalojë pa u ndëshkuar. Është shumë e rëndësishme që për këtë çështje SPAK të hetojë me shpejtësi dhe paanësi. Të dashur qytetarë! 110 milionë euro janë vetëm një pjesë e faturës së dështimit të Edi Ramës. Edhe 4 vjet të tjera, fatura do të shumëfishihet në kurrizin e fëmijëve tuaj! Ky është një rast i artë edhe për ne si qytetarë, që  të reflektojmë përpara se të votojmë. Të mendojmë se kur Edi Rama na troket në dorë, ta dimë se po na troket dështimi për të tretën herë. Ta dimë se vetëm me një gjyq të humbur për arsye mafioze secili nga ne ka 45 mijë lekë borxh për të paguar.” – theksoi përfaqësuesi ligjor i selisë blu.

Në fund Kaso tha se shqiptarët nuk do paguajnë më për aferat mafioze të Ramës, Agaçit e Veliajt dhe se ata duan drejtësi për për dëmin 110 milionë euro që u është shkaktuar.

 Me Partinë Demokratike në qeveri kjo nuk ka për të ndodhur. Shqiptarët nuk kanë për të paguar për aferat mafioze dhe korruptive të Edi Ramës, Engjëll Agaçit apo Erion Veliajt. Do të paguajnë ata vetë me pasuritë e tyre. Këtë do ta bëjë të mundur Partia Demokratike në ditët e para pas votëbesimit të 25 Prillit. Kush ka përgjegjësi për faturën 110 milionë euro, që nga Edi Rama, Erion Veliaj, Engjëll Agaçi, Avokatura e Shtetit dhe kushdo qoftë, jo vetëm do të shkojnë para drejtësisë, por do të paguajnë me pasurinë e tyre dëmin 110 milionë euro. Shqiptarët duan drejtësi dhe me Partinë Demokratike në krye të qeverisë do ta kenë atë! Ky është ndryshimi! Ta bëjmë atë realitet në 25 Prill duke votuar për PD dhe Lulzim Bashën!” – mbylli deklaratën Kaso.


Rregjistrohu
Më njofto
guest
0 Komente
Reagimet
Shikoni të gjitha komentet